ఈ ఆటో డ్రైవర్ ఏడు సార్లు టెడెక్స్ స్పీకర్.. గూగుల్, మైక్రోసాఫ్ట్‌లలోనూ ప్రసంగాలు!

వృత్తి ఏదైనా చేసే పనిపై ఇష్టముంటే సాధించలేనిది ఏదీ లేదని నిరూపిస్తున్నాడు చెన్నైకి చెందిన ఆటో డ్రైవర్ అన్నాదురై. సాధారణంగా మనం ఆటో ఎక్కితే డ్రైవర్‌తో పెద్దగా మాట్లాడం, గమ్యస్థానం రాగానే దిగిపోతాం. కానీ, చెన్నైలోని షోలింగనల్లూరులో ధరణి అనే మహిళకు ఎదురైన అనుభవం మాత్రం ఆమె జీవితంలో మర్చిపోలేని ఒక పాఠంగా నిలిచింది. ఆమె ఎక్కిన షేర్ ఆటో నడుపుతున్న అన్నాదురై.. కేవలం ఒక ఆటో డ్రైవర్ మాత్రమే కాదు, ఏడుసార్లు టెడెక్స్ (TEDx) వేదికలపై ప్రసంగించడంతో పాటు గూగుల్, మైక్రోసాఫ్ట్ వంటి అంతర్జాతీయ దిగ్గజ సంస్థలలో సైతం ప్రసంగాలు చేసిన అద్భుతమైన మోటివేషనల్ స్పీకర్. ఈ విషయాన్ని ధరణి తన ఇన్‌స్టాగ్రామ్ పోస్ట్‌లో పంచుకోవడంతో నెటిజన్లు ఆశ్చర్యపోతున్నారు.

ఆమె ఆటో ఎక్కిన మొదటి క్షణం నుంచే ఆ వాహనం ఆమెను ఎంతగానో ఆకట్టుకుంది. సాధారణ ఆటోలా కాకుండా ప్రయాణికులకు ఒక వినూత్న అనుభూతిని ఇచ్చేలా అన్నాదురై దానిని తీర్చిదిద్దాడు. ఆ ఆటోలో ఫ్రంట్‌లైన్, ఫెమినా, ఔట్‌లుక్ వంటి ప్రముఖ మ్యాగజైన్లు, వార్తాపత్రికలతో పాటు యూపీఎస్సీ (UPSC) పరీక్షల ప్రిపరేషన్ మెటీరియల్ కూడా ఉన్నాయి. అంతేకాకుండా, ప్రయాణికులు వాడుకోవడానికి రెండు ఐప్యాడ్లు, ఉచిత వైఫై, ఉచిత చాక్లెట్లు, గొడుగులు, ఒక మినీ కూలర్, వేడి కాఫీ ఫ్లాస్క్ వంటి సదుపాయాలు ఏర్పాటు చేశాడు. వీటన్నింటికీ మించి.. నర్సులు, ఉపాధ్యాయులు, వైద్యులు, పారిశుద్ధ్య కార్మికులకు తన ఆటోలో 'ఉచిత ప్రయాణం' అంటూ ఒక బోర్డును కూడా ఉంచాడు.

ఏడు భాషలు అనర్గళంగా మాట్లాడగలిగే అన్నాదురై.. ఎంతో ఉత్సాహంగా, నవ్వుతూ ప్రయాణికులను ఆకట్టుకుంటాడు. ప్రయాణం ముగిసే సమయానికి ఆటోలోని మరో ప్రయాణికుడు అన్నాదురైని గుర్తుపట్టి, గతంలో ఒక కాలేజీ వేడుకకు ముఖ్య అతిథిగా పిలిచామని చెప్పడంతో ధరణి ఆశ్చర్యపోయింది. ఆ తర్వాత అన్నాదురైతో మాట్లాడిన ధరణి.. అతడు మైక్రోసాఫ్ట్, గూగుల్ వంటి పెద్ద సంస్థలలో ప్రసంగాలు చేసిన అంతర్జాతీయ గుర్తింపు ఉన్న స్పీకర్ అని తెలుసుకుంది. పైగా, ధరణి ఒక టీచర్‌గా, డాక్టర్‌గా పనిచేస్తోందని తెలియగానే.. ఆటోలో ఉన్న నిబంధన ప్రకారం అన్నాదురై ఆమె నుంచి ఒక్క రూపాయి కూడా ఛార్జీ తీసుకోలేదు.

ఈ అరుదైన అనుభవం పని పట్ల తనకున్న దృక్పథాన్ని పూర్తిగా మార్చేసిందని ధరణి పేర్కొంది. మనమంతా ఉద్యోగాల గురించి నిరంతరం ఫిర్యాదులు చేస్తుంటామని, కానీ చేసే పనిని మనస్ఫూర్తిగా ప్రేమిస్తే, వంద శాతం అంకితభావంతో పనిచేస్తే ఏ రంగంలోనైనా ఉన్నత శిఖరాలను అధిరోహించవచ్చని 'అన్న' నిరూపించాడని కొనియాడింది. ఈ పోస్ట్ సోషల్ మీడియాలో వైరల్‌గా మారడంతో, వృత్తి ఏదైనా గౌరవం, ప్యాషన్, నైపుణ్యం అనేవి మన పనితీరులోనే ఉంటాయని అన్నాదురైని నెటిజన్లు ప్రశంసలతో ముంచెత్తుతున్నారు.